MBATHI 276 - 300

NDŨKAKĨE NĨ NAKU (No never alone) 1. Ndukakĩe nĩ naku  ninyie kyeni kyaku, Ta kya ndata ila ntheu ngũmulĩkĩle, O na kwĩna kĩvindu Yesũ easya ũũ; Ndũkakĩe nĩ naku ndikakũtia weka.   Chorus: Yesũ ndakandia nyioka ndakandia, Nĩwanengie watho ũũ nĩw’o, we ndakandia; Yesũ ndakandia nyioka, ndakandia, Nĩwanengie watho ũũ, nĩw’o ndandia nyoka.   2. Malaa nĩ masyaawa maavova makoma, Na syũa yĩkĩkena kũũ yayanĩ, Yesũ nĩwe ĩlaa yĩtheasya mwene; Yesũ kyeni kya ĩtunĩ we ndakandia nyioka.   3. Ona yĩla kwĩ mbanga ila syĩvithĩte, Yesũ akanzũvĩa nĩthwe n’ũtanu, O ta nyũnyi ikwina ngoo yakwa nĩ ndanu, Nĩngwina nĩ mũtanu nĩw'o ndandia nyioka. (Amen)

VE ŨMWE YU MWENDWA W’ANDŨ (There is one above) 1. Ve ũmwe yu, mwendwa w’andũ, Ũla wendete nthĩ yonthe, Nĩwe Yesũ mũtwovosya, Mwendwa wakwa, ndakandia.   Chorus: Mwendwa wakwa, …mũnyanyawa E nakwa yu, …vakuvĩ yu, 4/4 Ngili nyingĩ, …iũngyĩ kwake; Yu nakwa nyie nĩ ngethwa vo.   2. Nĩ wakwa yu, nĩwangw’ĩĩe, Na nĩwandangĩĩe nyie vyũ; Na nĩvoyaa na ũtanu Nũndũ Yesũ nĩ wakwa yu.   3. Nĩ wakwa yu, Mwĩaĩi Yesũ, Ithyĩ tũtikataanĩsya; Na thayũ ũla nĩ naw’o Wumaa kwake, mũvonokya.   4. Mũthenya ũmwe wũkĩte, Metho makwa makamwona: Na moko make makandwaa Kwake ĩtunĩ, Mwovosya. (Amen)

LĨLĨ, NGOO, VE MŨTANGĨĨI (Hark my soul it is the lord) 1. Lĩlĩ, ngoo ve Mũtangĩĩi, Ĩthukĩĩsye mwene tei; Yesũ nũkũkũly’atĩĩ, Nũkũmbenda, mũndũ mwai?   2. Ninyie nakũthasya ndii, Nakũvosya wĩ itau, Waĩwa, nakwon’ya we, Nakũthesya wĩ na naĩ.   3. Mũndũ mũka nde ĩnee Na mwana wasyaie? O n’akyũlwa nĩwe vyũ, Ngakũlilikana nyie.   4. Nĩ tei ũtathela, Wendo wakwa ndũalyũkaa, Nĩ mũnene, nĩ mũvyũ, Wĩ na vinya kwĩ kĩkw’ũ.   5. ũtaĩonĩ nĩvo nĩĩ, Naku ũkavika vo, Ũkekala vala nĩĩ, Nũkũmbenda, mũndũ mwai. (Amen)

YESŨ NĨ WENDO (God is love) 1. Yesũ nĩ wendo, Na nũmbendete, Yesũ nĩ wendo, Andangĩĩa.   Chorus: Ĩngĩ nĩasy’ atĩĩ, Yesũ nĩ wendo, Yesũ nĩ wendo, Andangĩĩa.   2. kwa ũndũ wakwa, Atw’ĩka mũndũ, Na anyamaw’a Andan’ye nyie.   3. kwa ũndũ wakwa, Akw’a mũtĩnĩ, Anthasye wathe Nĩthayũke.   4. Mwovosya wakwa, E kũy’ ĩtunĩ, Nĩngũmweteela Asyoke kũũ. (Amen)

TŨI MŨNYANYA TA MWĨAĨI YESŨ (There’s not a friend like the lowly Jesus) 1. Tũi na mũnyanya ta Mwĩaĩi Yesũ, Vai ũmwe, vai ũmwe, Mwene ũseo na wendo take, Vai ũmwe, vai ũmwe   Chorus: Nĩtwendetwe nĩ Yesũ mũno, Wendo wake ndwĩalyũlaa; Tũi na mũnyanya ta Mwĩaĩi Yesũ, Vai ũmwe, vai ũmwe.   2. Nĩtũendanasya myũnthĩ yonthe, Kĩla saa, kĩla saa; Na nũnũkwenda kũtũtetheesya, Kĩla saa, kĩla saa.   3. Ve mũndũ ũmwe ũtiwa nĩwe? Vai ũmwe, vai ũmwe; Kana mũthũku ũtaekewa? Vai ũmwe, vai ũmwe.   4. Ve Mũtangĩĩi ũngĩ ta Yesũ, Vai ũngĩ, vai ũngĩ; ũla ũtonya kwovosya andũ? Vai ũngĩ, vai ũngĩ. (Amen)

YESŨ, MWANA WA NGAI (Jesus loves me, this I know) 1. Yesũ, mwana wa Ngai, We nũtwendete mũno; Nĩwaumie kwake, Ooka kũtũtangĩĩa.   Chorus: Yesũ nũmbendaa, Yesũ nũmbendaa, Yesũ nũmbendaa, Na wendo mũnene.   2. Ĩĩ, Yesũ nĩwokie Kũmantha andũ make; Nĩwambiwe mũtĩnĩ Aĩve mathiĩ maitũ.   3. Ngoo yakwa nĩmũnenga Ĩtw’ĩke nyũmba yake; Ndakathama vo ĩngĩ, Nũndũ n’ũtũo wake. (Amen)

NGAI NĨWAMBĨWĨE TEI (In tenderness He sought me) 1. Ngai nĩwambĩwĩe tei, Yĩla naĩ wathenĩ; Ambonisye ĩvĩtyo Ya kũmũvũthĩĩsya. Kũtiĩ kũũ nthĩ wendo ta ũũ Wa Yesũ kwia thayũ nthĩ.   Chorus: Wendo waĩ mũnene: Aumya nthakame Andetee thayũ , aingw’ĩĩa nyie, Yesũ andangĩĩe na wendo.   2. Ĩĩ, nĩw’o nĩ ũseo, Ũvoo kũvika kũũ, Nĩ wa kũtũtetheesya Nthĩnĩ wa ngoo sitũ. Kũtiĩ kũũ nthĩ ndeto ta ii, Yesũ nĩwe Mũtangĩĩi.   3. Yesũ aimantha andũ Ambĩthĩie wathenĩ; Na andekee mawathe, Kwa ũũ nĩwakwie. Kũtiĩ kũũ nthĩ mũyo ta ũũ, Kũekewa naĩ syakwa vyũ. (Amen)

VE ŨMWE ŨLA NĨMWENDAA (O how I love Jesus) 1. Ve ũmwe ũla nĩmwendaa Kwĩ andũ onthe ma kũũ nthĩ, Nĩ Yesũ, ũ mũtũtangĩĩi, Na nowe ũmbendaa nyie.   Chorus: Nĩnĩmwendaa Yesũ, Ĩĩ nĩnĩmwendete Nĩnĩmwendaa Yesũ Nũndũ ambendie mbee.   2. Aĩ na mũvw’anĩle wa Ngai, Yĩla waĩ kwake ĩtunĩ, Eenyivya mwene, ooka nthĩ Na wũmbe wa andũ kũũ.   3. Atwon’ya ĩthe wake Ngai Kwa meko make andũnĩ, Na ĩndĩ aia thayũ nthĩ, Nĩ kwondũ wa ene naĩ.   4. Asyũka e ĩtunĩ yu: Na onthe ala mamwosaa Manengawe ũtonyi vyũ W’ũtw’ĩka syana sya Ngai.   5. Twonan’yei ĩndĩ wendo ũũ Kwa kũmatavya angĩ, Meth’we me wĩtĩkĩlonĩ O yĩla wĩũka kũũ. (Amen)

NGAI NĨ WENDO (God is love) 1. Ngai nĩ wendo nĩtũũsoma, Ĩvukunĩ ve ũvoo: Ĩtu nayo na nthĩ kw’onthe Itwonasya ũũ nĩ w’o   Chorus: Alelũya, Ngai nĩ wendo Nũtwendete ithyonthe: Andũ onthe, ĩtĩkĩlai! Ngai nĩ wendo mũnene.   2. Ngai nĩ wendo, nũtethasya, Myũnthĩ yonthe e naitũ; Wendo ũkĩlĩte w’onthe, Nũtũsũvĩaa ithyĩ.   3. Ngai nĩ wendo tavanasyai, Nĩwaũmisye Yesũ, Ũla wokie kũmantha Na kũtangĩĩa andũ.   4. Ngai nĩ wendo tei mũnene, Atũekee mawathe Wendo wake nũũmanyĩka Ũndũ Yesũ wakw’ie. (Amen)

WENDONĨ WA YESŨ (In the heart of Jesus) 1. Wendonĩ wa Yesũ ve vandũ vaku, Wendo ũla wa w’o wendo mũtheu, Nĩkĩ wĩo weka, ũte mũtethya, Na wendo wa Yesũ nũkwĩanĩe?   2. Wendonĩ wa Yesũ ve mwanya waku Yu nĩwaĩlĩte kũmwĩtĩkĩla, Nĩkĩ ũkũlea wendo wĩan’ũũ, Na wendo wa Yesũ nũkwĩanĩe?   3. Wĩanĩ wa Yesũ ve ũthei waku, Ũla alaĩka matanengetwe. Nĩkĩ ũkweteela kũmantha ũngĩ, Na wĩa wa Yesũ nũkwĩanĩe?   4. Nyũmbanĩ ya Yesũ, wĩkalo nĩ voĩ, Vandũ vaseũvĩtw’e ũndũ tũtesĩ, Nĩkĩ ũkũmantha wĩkalo vangĩ, Na kũya kwa Yesũ ve vandũ vaku? (Amen)

NTHĨ ĨNO (God loved the world of sinners) 1. Nthĩ ĩno ya ala ene naĩ, Ngai nĩwamyendie, Yu ve ũtangĩĩo mwoneku Tũnengetwe mana.   Chorus: Waĩ wendo nĩw’o waĩ wa Ngai Wendo ũũ mũnene, Wa Yesũ kuma ĩtunĩ Kũka kũtũkw’ĩĩa.   2. Yu nĩ wakwa nakwa nĩ wake, Nĩngũmwĩkwatya vyũ, Nthakame yake yantheisye, Nakwa navonoka.   3. Wendo wa Ngai nĩwusũĩte Ngoo yakwa nthĩnĩ vyũ. Nathaiw’e mũio wa naĩ Neeetĩkĩla Yesũ.   4. twinei oyũ tũteũkĩa Vinya wa satani; Nũndũ Yesũ nũmũsindĩte, Na twĩ atangĩĩe   5. Andũ ma ngai, tũtanei mũno, Nthĩ ĩkĩtũmena; Mũyo witũ yu wĩ ĩtunĩ Wa tene na tene. (Amen)

YESŨ NŨMBENDAA (Jesus has loved me) 1. Yesũ nũmbendaa, Yesũ mũnene! Yesũ nũmbendaa na nĩnĩmwendaa mũno; Nĩwookie kũũ kwovosya andũ, Kũmantha na kũmatangĩĩa vyũ.   Chorus: Yesũ nakathwe, Yesũ mũnene, Yesũ nakathwe yu tene na tene; Yesũ nakathwe, Yesũ mũnene! Yesũ nakathwe na kanyw’a na ngoo.   2. Yesũ ambona, Yesũ mũtheu! Yesũ ambona nzĩanĩ ya mawathe. We ambovosya wanangĩkonĩ, Na akw’a mũtĩnĩ ũndũ wakwa.   3. We nũmbonasya, Yesũ mũseo! Nũmbonasya kana akooka ĩngĩ; Nĩ w’o akooka kwĩsĩa make, Matwaw’ ĩtunĩ kũsumbĩka vo.   4. Nĩnĩtanĩte matukũ onthe, Ũndũ wa vinya wake we kũkĩlya naĩ, Yu Ngai e nakwa, nakwa nĩ nake; Tũendanasya mĩthenya yonthe.   5. Yu nyie nĩngwenda kũmwendeesya, Kũmũsũng’ũkya na kũmũvĩtũkya mbee; Kũmũatĩĩa andongoesye, Nĩtavanasye ũvoo ũũ wake. (Amen)

SISYAI WENDO (Behold what love) 1. Sisyai wendo, wendo wa w’o, Ngai Asa woonanisye, Nĩ kana ala ithyĩ twaĩ au, Tũtwĩke syana syake.   Chorus: Sisyai wendo wĩanata- Wendo wĩana ata Ngai Asa Wonanisye kwitũ, Nĩ kana twĩtwe syana; Twĩtwe syana sya Ngai.   2. Nthakame ya Mwana wake Nĩyo ya tũtheisye, Na ũndũ wa ũsu Mwendwa Tweew’anĩthw’a nĩ Ngai.   3. Ndyĩsĩ tũkethwa tũilyĩ ata, Twĩ ũtheunĩ wa Ngai Ĩndĩ yĩla Mwĩaĩi wĩũka, Tũkavw'ananw'a nake.   4. Nayu twĩthĩwe twĩ atheu ngoo, Nũndũ twĩna wĩkwatyo, Yesũ ũla mũtheu kwĩ ithyĩ, Tũkoona ũthyũ wake.

TŨTANEI NTHĨNĨ WA MWĨAĨI (Pardon, peace and power) 1. Tũtanei nthĩnĩ wa Mwĩaĩi Kwa ndeto syake Mwĩaĩi Nĩwatũtheisye.   Chorus: 12/8 Kwĩ ũekeo , Kwĩ mũuo, Kwĩ ũtheu kũu ĩtunĩ; Kwĩ ũtanu kwa alaĩka, Nũndũ wa ũmwe akĩtangĩĩwa.   2. Kwa mumo wake Mwĩaĩi, Naĩ nĩvetetwe vyũ; Nĩna mũuo wusũĩte, No kwondũ wa nthakame.   3. Kwa vinya wake Mwĩaĩi Nũnengae kũkĩlya; Veva mũtheu ngoonĩ yakwa, Nũnengae ũkĩlya naĩ.   4. Veva mũtheu ena ũtonyi, Kũthyũũa ngoo sitũ; Imwelekele Ngai waitũ, Nĩ kana isũvĩwe. (Amen)

MBATHI SYĨ MŨYO (Songs of gladness) 1. Mbathi syĩ mũyo syotanu, Nĩsinawa kũya ĩtunĩ; Ala mavikie tene, Namo mainaa myũnthĩ yonthe.   Chorus: Syĩ mũyo na syotanu, Nĩsinawa kũya ĩtunĩ Nĩmekwina makyasya, Ngai nĩ wendo, Ngai nĩ thayũ.   2. Kyeni kya syũa kĩi vata, Nĩ kũseo na nĩ kũtheu; Kwĩ mũuo ũtathimĩka; Nĩ nthĩ ya kyeni, nthĩ ya wendo.   3. Atheu a mavikĩe, Nĩmainaa vamwe na alaĩka; Wathi wa thayũ na wendo, Alelũya Ngai nĩ wendo.   4. Vaiĩ ũthei wa naĩ, O na nzika o na wia, Nũndũ vai kĩkw’ũ nongi, No thayũ wa tene na tene. (Amen)

ŨNDŨ ŨMWE (One thing I of the Lord desire) 1. Ũndũ ũmwe ũla ngwenda, Kwa kwĩthĩwa naĩ mũthũku, Nĩ kũthew’a naĩ syakwa yu, Kũthew’a vyũ, kũthew’a vyũ.   Chorus: Ũnthesye yu ngoo yakwa, Na mwaki tũ, kana thĩna. Vati ũndũ ethwa wathe Ũkakw’a vyũ ngoonĩ yakwa.   2. Wanenga kwona mawoni, Nĩngũtana na kwĩw’a mũyo Ĩndĩ o ũla ngwenda yu Nĩthew’e ngoo, nĩthew’e ngoo.   3. Ĩĩ, ngoo yakwa yathew’a vyũ, Veva mũtheu akamanyĩsya, Na kũmbon’ya nĩmanye nyie Maũndũ meũ, maũndũ meũ.   4. Nĩngũvoya kĩla myũnthĩ, Mwĩaĩi andongoeasye, Na ngatata kwĩthesya, Ngĩemwa vyũ , ngĩemwa vyũ.   5. Nĩngũmũĩkĩĩa Yesũ, Myũnthĩ yonthe andetheeasye, Nĩngũkĩlya vinya nĩ kũũ Kwondũ wake, kwondũ wake. Amen

YESŨ NŨKWENDA TWĨKALAE (Jesus wants me for a sunbeam) 1. Yesũ nũkwenda twĩkalae Twĩ kyeni kyake yu, Kũndũ kwonthe kũũ kĩvindu Kyanangwe kyonthe vyũ   Chorus: Ta nyaĩĩ sya Yesũ, Yesũ nũkwenda twĩkale; Ta nyaĩĩ sya Yesũ, Yesũ nũkwenda mũno.   2. Yesũ nũkwenda tũmendae Andũ onthe kũũ nthĩ Tũkĩmweteela na mũyo Na mũamba waw’o.   3. Nĩngũmũvoya Yesũ yũ, Anzeũvye ngoo yakwa, Anthesye wathe ũũ wakwa, Nĩthwe nĩ mwene w’o.   4. W’oa watema kĩvindu Nĩkĩthelaa oyu, Yesũ nũkwenda nonan'ye Kyeni kyake o t’ũũ. (Amen)

NGOO YAKWA NĨNĨŨKUSW’A (Still sweeter every day) 1. Ngoo yakwa nĩnĩũkusw’a nĩ Yesũ Mũtangĩĩi: Nĩwe mũseo kũvĩtũka onthe kũkũ nthĩ, Na nĩwe ũtisu wa ũtheu wa Ngai mwene, Na nĩngũmwenda mbee na mbee ngyeteela asyoke.   Chorus: Tũtiũmanya ũndũ tũketh’wa tũilyĩ; Nĩtũkamanya vyũ twamwona Mwĩaĩi Yesũ.   2. Nĩwe mũtisũ kũvĩtũka ndata ya kwakya; ũtheu wake nĩwandisĩe nĩ kũasa Nĩwĩanĩasya vata wakwa myũnthĩ yonthe, Na nĩngũmwenda mbee na mbee ngyeteela asyoke,   3. Ngoo yakwa nĩnĩũleela yĩla nĩ kũkũ nthĩ, ĩndĩ ũvuũkyo nĩwũkaa akĩnzũvĩlĩla; Nũmbaũaa mĩio ya naĩ na mawĩmakĩo, Na nĩngũmwenda mbee na mbee ngyeteela asyoke. (Amen)

MOTANŨ MA NTHĨ NDIMENDAA (Earthly pleasures vainly call me) 1. Motanu ma nthĩ ndimendaa, Nĩthĩwe ta Yesũ; Vati ũmwe ũkambova, Nĩthĩwe ta Yesũ.   Chorus: Wathi wakwa nĩw’o ũũ, Nĩthĩwe ta Yesũ vyũ; Kwitũ, kw’onthe kĩla saa, Nĩthĩwe ta Yesũ.   2. Yesũ nĩwamanangie, Nĩthĩwe ta Yesũ; Ala mawendi ma tene, Nĩthĩwe ta Yesũ.   3. Nakwa nĩendete ĩtunĩ, Nĩthĩwe ta Yesũ; Ngĩtavany’a syĩtwa yake, Nĩthĩwe ta Yesũ.   4. Nĩkalae wĩanĩ wake, Nĩthĩwe ta Yesũ; Ngyeteela andwae kwake, Nĩthĩwe ta Yesũ. (Amen)